Қотыр торғай

Бір қотыр торғай шеңгелге қонып отырса, қотырының қатпарланған аузын шеңгелдің тікенегі сыдырып кетіпті. Торғай ашуланып:
— Қап, бәлем, сені ешкіге айтпасам ба! — деп, ешкіге келіп:
— Ешкі, ешкі, ана шеңгелдің сылдырмағын неге жемейсің? — дейді. Ешкі:
— Оны жемек түгіл, өзім лақтай алмай жатырмын, — дейді. Торғай:
— Қап, бәлем, сені қасқырға айтпасам ба!
— Қасқыр, қасқыр, ана ешкіні неге жемейсің?
Қасқыр:
— Оны жемек түгіл, өзім байдың жабағысын жеп, тауыса алмай жатырмын.
Торғай:
— Қап, бәлем, сені жылқышыға айтпасам ба?
— Жылқышы, жылқышы, ана қасқырды неге соғып алмайсың?
Жылқышы:
— Оны ұрмақ түгіл, өзімнің ұйқым қанбай түр.
Торғай:
— Қап, бөлем, сені байға айтпасам ба?
— Бай, бай, ана жылқышыны неге ұрмайсың?
Бай:
— Оны ұрмақ түгіл, өзім қоспамды түгесе алмай жатырмын.
Торғай:
— Қап, бәлем, сені тышқанға айтпасам ба!
— Тышқан, тышқан, байдың қоспасын неге жемейсің?
Тышқан:
— Оны жемек түгіл, өз інімді қаза алмай жатырмын.
Торғай:
— Қап, бөлем, сені балаларға айтпасам ба!
— Балалар, балалар, ана тышқанды неге ұрып алмайсыңдар?
Балалар:
— Оны ұрмақ түгіл, өзіміз асығымызды ойнай алмай жатырмыз.
Торғай:
— Қап, бәлем, сендерді кемпірге айтпасам ба!
— Кемпір, кемпір, ана балаларды неге ұрмайсың?
Кемпір:
— Оларды ұрмақ түгіл, өзім жүнімді түте алмай жатырмын.
Торғай:
— Қап, бәлем, сені құйынға айтпасам ба!
— Құйын, құйын, кемпірдің жүнін неге ұшырмайсың?
Құйын соғып, кемпірдің жүнін ұшырыпты, кемпір келіп балаларды ұрыпты, балалар тышқанды ұрып жібереді, тышқан байдың қоспасын теседі, бай жылқышыны ұрады, жылқышы қасқырды ұрып алады, қасқыр ешкіні жейді, ешкі шеңгелдің сылдырмағын жейді. Сөйтіп, қотыр торғай өшін алады.